इटहरी / कार्यालयभित्र बसेर सेवाग्राहिहरूबाट घुस लिएको भन्दै इटहरी उपमहानगरपालिकाका एक कर्मचारीलाइ मेयर द्वारिकलाल चौधरीले गलत्याएर बाहिर निकालेका छन । मंगलबार दिउसो घुस लिएको आरोपमा सव ओभरसियर राम खडकालाइ गलत्याएर बाहिर निकालेपछि कर्मचारीहरूले मेयर बिरूद्ध धावा बोल्दै सडक समेत अवरूद्ध बनाएका थिए ।

लामो समयदेखि इटहरी उपमहानगरपालिकाको कार्यालयमा कर्मचारीहरू बिरूद्ध गुनासो सुन्दै आएका मेयर चौधरीले मंगलबार सव ओवरसियरलाइ रंगेहात फेला पारेको दावि गर्दै कार्यालयबाट निकालेरबाहिर लखेटेको बताएका छन । यता खडकालाइ अपमानित ढंगले बिना प्रमाण मेयर चौधरीले आरोप लगाएको भन्दै इटहरी उपमहानगरका कर्मचारीहरू आन्दोलित समेत बनेका छन ।

मेयर चौधरीले कार्यालय भित्र दादागिरी देखाएको र कर्मचारीको कुरा नसुनि हेपुवा प्रविति अपनाएको भन्दै उपमहानगरका कर्मचारीहरूले पूर्व पश्चिम राजमार्ग समेत केहि समय अवरूद्ध बनाएका थिए । कर्मचारीहरूले मंगलबार इलाका प्रहरी कार्यालय इटहरीमा शुरक्षा माग गर्दै मेयर चौधरी बिरूद्ध नाराबाजी समेत गरेका थिए । यता मेयर चाैधरी भने घुस खाने कर्मचारीलाइ नगरपालीकाभित्र कुनै ठाउ छैन भन्दै जागिरबाट निलम्बनकाे तयारीमा जुटेका छन ।