बेइजिङ,९ पुस । अहिले विश्वभर कोरोना संक्रमणको जोखिम बढ्दै गएको छ । चीनमा कोभिड-१९ को ओमिक्रोन भेरियन्टको सब-भ्यारियन्ट BF.7 ले कहर निम्त्याइरहेको छ । चीनको अवस्था अनियन्त्रित भएको छ ।
चीनमा लगभग ३ करोड ७० लाख मानिस यस हप्ता एकै दिन कोभिड–१९ बाट संक्रमित भएको हुन सक्ने सरकारको शीर्ष स्वास्थ्य निकायले अनुमान गरेको छ । यसलाई विश्वमा एकै दिन सबैभन्दा ठूलो संख्यामा महामारी बताइएको छ ।
डिसेम्बरको पहिलो २० दिनमा करिब २४ करोड ८० लाख मानिस वा जनसंख्याको झण्डै १८ प्रतिशतमा यो भाइरसको संक्रमण भएको हुनसक्ने चीनको राष्ट्रिय स्वास्थ्य आयोगको बुधबार सम्पन्न आन्तरिक बैठकको छलफलमा संलग्न व्यक्तिहरूले पुष्टि गरेका छन्।
बेइजिङको कोभिड शून्य नीति अन्त्यले प्रतिरक्षा न्यून भएको जनसंख्यामा अत्यधिक संक्रामक ओमिक्रोन भेरियन्टहरूको अव्यवस्थित फैलावट भएको छ । एजेन्सीको अनुमान अनुसार चीनको दक्षिणपश्चिममा रहेको सिचुआन प्रान्त र राजधानी बेइजिङका आधाभन्दा बढी बासिन्दाहरू संक्रमित भएका छन् ।
सडकभन्दा अस्पतालमा धेरै भीड छ । अस्पतालमा उपचारका लागि ठाउँ नै नरहेको अवस्थामा मानिसलाई भुइँमा सुताएर उपचार गर्नुपर्ने बाध्यता छ । धेरै संख्यामा मृत्यु भएका कारण पनि शवदाह स्थलमा लामो लाइन छ ।
आगामी दिनमा चीनको अवस्था बिग्रन सक्ने दाबी गरिएको छ । चौतर्फी विरोधपछि चीनले केही दिनअघि शून्यकोभिड नीति अन्त्य गरेको थियो ।
