बागलुङ — नेकपा एमाले बागलुङको अध्यक्षमा पुनः हिराबहादुर केसी निर्वाचित भएका छन । बागलुङ बजारमा जारी दशौं अधिवेशनबाट केसी दोस्रो कार्यकालको लागि अध्यक्षमा सर्वसम्मत चयन भएका हुन् ।
शुक्रबार अध्यक्षको लागि केसी र नेकपा एमाले गण्डकी प्रदेश कमिटीका पूर्वसदस्य हरिनारायण गौतमले उम्मेदवारी दर्ता गराएका थिए । गौतमले उम्मेदवारी फिर्ता लिएपछि केसी सर्वसम्मत अध्यक्षमा निर्वाचित भएका हुन् ।
यस्तै उपाध्यक्ष र सहसचिवमा पनि सर्वसम्मत उम्मेदवारी चयन भएका छन । उपाध्यक्षमा विष्णु भुसाल सर्वसम्मत चयन भएका छन । भुसाल यसअघि जिल्ला सचिव थिए । यसैगरी उपसचिवमा धनबहादुर परियार र करमती पुनः चयन भएका छन् । उपसचिवमा परियार र पुनको मात्रै उम्मेदवारी परेको हो।
सचिवमा तीन जनाको उम्मेदवारी परेको छ। गणेश थापा, चन्द्र गणेश पौडेल र कुमार खड्काले उम्मेदवारी दर्ता गराएका थिए । सचिव र सदस्यहरूमा सहमतिको प्रयास भइरहेको अध्यक्ष मण्डलले जनाएको छ। निर्वाचन समितिले आधिकारिक रुपमा घोषणा गर्न भने बाँकी रहेको छ ।
