भेनेजुएलामा लगातार दुई शक्तिशाली भूकम्पले सिङ्गो देशलाई त्रसित बनाएको छ। रिक्टर स्केलमा पहिलो भूकम्प ७.१ र दोस्रो ७.५ म्याग्निच्युडको मापन गरिएको छ। लगातार आएका यी झट्काहरूलाई भेनेजुएलाको इतिहासमा पछिल्लो १०० वर्षकै सबैभन्दा शक्तिशाली भूकम्प मानिएको छ।
अमेरिकी भूवैज्ञानिक सर्वेक्षण (USGS) का अनुसार, ७.५ म्याग्निच्युडको मुख्य भूकम्प स्थानीय समयअनुसार २४ जुन २०२६ को साँझ ६ बजेर ५ मिनेटमा (१८:०५:१२) गएको थियो। यसको केन्द्रविन्दु मोरोन सहरबाट करिब १६.२ किलोमिटर र प्रमुख औद्योगिक सहर भ्यालेन्सियाबाट करिब ४३.३ किलोमिटर उत्तर-पश्चिममा रहेको थियो। जमिनबाट मात्र १० किलोमिटरको गहिराइमा केन्द्रविन्दु रहेकाले यसलाई निकै खतरनाक मानिएको छ र यसको कम्पन सिधै भवनहरूसम्म पुगेर तीव्र झट्का महसुस गराएको थियो।
भूकम्पका कारण मोरोन, मोन्टालबान, बेजुमा, मिरान्डा र भ्यालेन्सियाजस्ता बाक्लो बस्ती भएका क्षेत्रहरू सबैभन्दा बढी प्रभावित भएका छन्। ती क्षेत्रका ठूला-ठूला भवनहरूमा दरारहरू परेका छन् र त्रासका कारण मानिसहरू सडकमा भागेका थिए। सडकमा रोकिराखिएका कारहरू खेलौनाजस्तै हल्लिएका थिए भने घरभित्रका सामानहरू खसेर फुटेका थिए। धेरै सहरहरूमा बिजुली र इन्टरनेट-फोन सेवा केही समयका लागि बन्द हुँदा मानिसहरूलाई आफ्ना परिवारसँग सम्पर्क गर्न कठिनाइ भएको थियो। तटीय क्षेत्रहरूमा पहिरो (ल्यान्डस्लाइड) गएका कारण सडकहरू समेत अवरुद्ध भएका छन्। यद्यपि, हालसम्म कुनै ठूलो मानवीय क्षति वा हताहत भएको आधिकारिक पुष्टि भने भएको छैन।
भेनेजुएला क्यारिबियन र दक्षिण अमेरिकी टेक्टोनिक प्लेटहरूको सिमाना (एक्टिभ फल्ट लाइन) मा अवस्थित भएकाले यहाँ भूकम्पको जोखिम सधैँ रहन्छ। तर एकै दिनमा लगातार यति ठूला दुई झट्का आउनुले जमिनभित्र कुनै ठूलो हलचल भइरहेको सङ्केत गरेको वैज्ञानिकहरूको भनाइ छ।
विपद् लगत्तै प्रशासन र नागरिक सुरक्षा विभागले सर्वसाधारणका लागि गाइडलाइन जारी गर्दै नआत्तिन (प्यानिक नहुन) र क्षति पुगेका भवनहरूमा नफर्कन अपिल गरेको छ। परकम्प (आफ्टरशक)को जोखिमलाई ध्यानमा राख्दै मानिसहरूलाई खुला र सुरक्षित स्थानमा रहन सल्लाह दिइएको छ। स्थानीय अस्पतालहरूलाई 'हाई अलर्ट'मा राखिएको छ र प्रभावित क्षेत्रहरूमा एम्बुलेन्स परिचालन गरिएको छ। भग्नावशेष हटाउन र फसेका मानिसहरूको उद्धार गर्न स्वयंसेवक तथा उद्धार टोलीहरू खटिएका छन् भने पिउने पानी र अत्यावश्यक खाद्यान्न वितरणको काम पनि सुरु भइसकेको छ।
