सर्लाही—सर्लाहीमा आत्मदाहको प्रयास गरेका एक युवकको उपचारका क्रममा निधन भएको केही घण्टामै रौतहटमा पनि एक युवकले आत्मदाहको प्रयास गरेका छन्।
मंगलबार राति करिब १ बजे रौतहटको गरुडा नगरपालिका–९ गम्हरियाका २८ वर्षीय गौतम कुमार सहनीले आफ्नै शरीरमा पेट्रोल खन्याएर आगो लगाएका हुन्।
गरुडा–९ का वडा अध्यक्ष राजेश सहनीका अनुसार गौतम केही दिनयता मानसिक तनाव र डिप्रेसनबाट पीडित थिए। उनले आफ्नै मोटरसाइकलबाट पेट्रोल निकालेर शरीरमा खन्याई आत्मदाहको प्रयास गरेका हुन्।
गौतम गरुडा बजारस्थित झाझ पुलनजिक छाप्रे होटल सञ्चालन गर्दै आएका थिए। सोही व्यवसायबाट उनले आफ्ना तीन छोरा र परिवारको जीविकोपार्जन गर्दै आएका थिए।
आत्मदाहको प्रयासलगत्तै परिवारका सदस्यले उनलाई तत्काल गरुडास्थित बेटर नेपाल अस्पताल पुर्याएका थिए। त्यहाँ प्राथमिक उपचारपछि थप उपचारका लागि काठमाडौंस्थित कीर्तिपुर बर्न अस्पताल रिफर गरिएको इलाका प्रहरी कार्यालय गरुडाले जनाएको छ। उनको शरीरको करिब ३५ प्रतिशत भाग जलेको बताइएको छ।
यसअघि गत शुक्रबार सर्लाहीको गोडैता नगरपालिका–१० सिसौटियाका ३५ वर्षीय विवेक मण्डलले पनि आत्मदाहको प्रयास गरेका थिए। उनको शरीरको करिब ८५ प्रतिशत भाग जलेपछि नेपाली सेनाको हेलिकोप्टरमार्फत काठमाडौंस्थित कीर्तिपुर बर्न अस्पताल लगिएको थियो। उपचारकै क्रममा मंगलबार उनको निधन भएको थियो।
सर्लाहीको घटनाको केही दिनमै रौतहटमा पनि यस्तै प्रकृतिको अर्को घटना भएपछि मानसिक स्वास्थ्य, समयमै उपचार र सामाजिक सहयोगको आवश्यकता थप गम्भीर रूपमा महसुस गरिएको छ। रौतहट घटनाबारे प्रहरीले थप अनुसन्धान गरिरहेको जनाएको छ।
समाचार स्रोत: नागरिक दैनिक
_1739267551.png)
