विराटनगर । विराटनगर महानगरपालिका–३ स्थित बाल सुधारगृहमा सोमबार बिहान प्रहरीले छापा मारेको छ ।
मोरङ प्रहरीको टोलीले आज बिहान सुधार गृहमा छापा मार्दा ६ थान मोबाइल फोन भेटिएको छ ।
सुधार गृहभित्र मोबाइल प्रयोग गर्न प्रतिबन्ध रहे पनि त्यहाँ रहेका बालबिज्याइँकर्ताले लुकिछिपी मोबाइल चलाउने गरेको पाइएको हो ।
मोबाइल बरामद गरेको बाल सुधार गृह विराटनगरका प्रमुख सञ्जीव न्यौपानेले जानकारी दिए ।
‘प्रशासनबाट नियमित रूपमा चेकजाँच हुने गरेको छ । सोही क्रममा सुधार गृहभित्र रहेका बालबिज्याइँकर्ताले प्रयोग गर्दै आएका मोबाइल बरामद भएका हुन्,’ उनले भने ।
मोबाइलसँगै सुधार गृहभित्र सुर्तीजन्य वस्तुसमेत फेला परेको छ । बाल सुधार गृहको सुरक्षाका लागि नेपाल प्रहरीका एक जना प्रहरी सहायक निरीक्षक (सई) को कमान्डमा ११ जना प्रहरी खटिएका छन् ।
सुरक्षा व्यवस्था हुँदाहुँदै पनि बालबिज्याइँकर्ताका आफन्तले सुरक्षा निकायको आँखा छलेर मोबाइल फोन भित्र पुर्याएको हुन सक्ने अनुमान गरिएको छ ।
बाल सुधार गृहमा क्षमताभन्दा निकै बढी बालबिज्याइँकर्ता राखिएका छन् । ५० जनाको क्षमता रहेको ए ब्लकमा १९३ जना छन् ।
त्यस्तै, कारागारभित्र रहेको बी ब्लकमा ६२ जना रहेका छन् । बी ब्लकमा १८ वर्ष उमेर नाघेका र उच्छृङ्खल गतिविधिमा संलग्न भएकाहरूलाई राखिएको छ । दुवै ब्लकमा गरी सोमबारसम्म २५५ जना रहेका छन् ।
यसअघि पनि मोरङ कारागारभित्र रहेका बालबिज्याइँकर्तालाई भेट्न जाने क्रममा दुई जना युवतीको साथबाट लागूऔषध बरामद भएको थियो ।
सशस्त्र प्रहरीले शंका लागेर कारागारको मुख्य गेटमा जाँच गर्ने क्रममा ती युवतीको साथबाट लागूऔषध फेला पारेको थियो ।
_1748709835.png)
_1790090749.png)