विराटनगर । विराटनगरमा दुई युवा बाख्रा चोरीको आरोपमा पक्राउ परेका छन् । बाख्रा चोरी गरी आफ्नै घरमा लुकाएर राखेको आरोपमा विराटनगर महानगरपालिका–३ का ३६ वर्षीय प्रकाश राजवंशी र २४ वर्षीय श्याम राजवंशी पक्राउ परेका हुन् ।
कात्तिक ११ गते राति विराटनगर महानगरपालिका–४ स्थित एक घरबाट एउटा खशी र एउटा बाख्रा चोरी गरेको मोरङ प्रहरीका सूचना अधिकारी डीएसपी मकेन्द्रकुमार मिश्रले बताए ।
त्यसैगरी, कात्तिक १४ गते राति विराटनगर–३ स्थित अर्को घरबाट एउटा खशी र एउटा बाख्राको पाठा चोरी गरेको जानकारी मिश्रले दिए ।
चोरी गरिएका चारवटै बाख्रा आफ्नै घरमा लुकाएर राखेको सूचनाका आधारमा प्रहरीले कात्तिक १४ गते बिहान उनीहरूको घरमा खानतलासी गरेको थियो ।
सो क्रममा दुईवटा खशी, एउटा माउ बाख्रा र एउटा पाठासहित दुवै जनालाई नियन्त्रणमा लिइएको प्रहरीले जनाएको छ ।
पक्राउ परेका दुवै जनाविरुद्ध चोरीसम्बन्धी कसुरमा मुद्दा चलाउन अदालतबाट म्याद थप गरी घटनाको विस्तृत अनुसन्धान अघि बढाइएको डीएसपी मिश्रले बताए ।
_1748709835.png)
_1790090749.png)